'हॉट' मुलींची खरीखुरी गोष्ट

एक ट्रेसा नावाची मुलगी, अवघी एकोणीस वर्षांची..

भरपूर पैसे कमावण्याच्या नादात आयुष्याची एक अशी वाट निवडते ज्याचं तिला सुरूवातीला काहीच वाटत नसतं, ना त्या वाटेचं गांभीर्य, त्यातले धोके नि त्या वाटेनं आयुष्याचं होणारं मातेरं हे काही काही कळण्याची कदाचित तिची क्षमता नसते किंवा त्याकडे ती सहज दुर्लक्ष करत पुढे निघालेली असते.

ही वाट असते .. पॉर्न इंडस्ट्रीची..

ट्रेसा आपल्या पायावर उभं रहाण्यासाठी या इंडस्ट्रीत काम करण्याचा पर्याय स्वेच्छेने निवडते. शहराबाहेर दूर कुठेतरी एकांतातील एका बंगल्यात एका पॉर्न व्यावसायिकाने तळ ठोकलेला. तिथे तो अशा मुलींना पैशाचं अमीष दाखवून तर कधी प्रसिद्धीचं अमीष दाखवून घेऊन येतो. कधी काही ट्रेसासारख्या मुली स्वेच्छेनं पैसाप्रसिद्धीला भुलून या वाटेनं येतात.. आणि मग स्वतःच्या शरीराचा उघडानागडा बाजार मांडतात. या इंडस्ट्रीत पुढे रहाण्यासाठी त्यांना जे काही करावं लागतं ते किती जास्त विकृत ..

नेटफ्लिक्सवरती काही वर्षांपूर्वी प्रदर्शित झालेली वेबफिल्म " HOT GIRLS WANTED" ही याच साऱ्या प्रवासाची, जीवनाच्या या आडवळणाची खरीखुरी कथा.

ट्रेसाच्या जीवनात तिचा बॉयफ्रेंड येतो, खरंखुरं प्रेम करणारा, तिच्यासाठी त्याच्या मनात आदर नि प्रेम याशिवाय काही नाही .. आणि तो जेव्हा तिला ही जाणीव करून देतो की तू पैशांसाठी काय करतीयेस बघ .. त्यानंतर ट्रेसाचं मन जागं होतं. त्याच्या प्रेमाने तिचं मतपरिवर्तन होतं. जेव्हा ट्रेसा आपल्या कबिल्यातून काही दिवस सुट्टी घेऊन घरी परतते तेव्हा ती पहिल्यांदा आपल्या या कामाविषयी आईला कल्पना देते. आईचा जीव कासावीस होतो. डोळ्यात पाणी तरळतं. तिचे बालपणीचे फोटो, तिच्या गोड गोड आठवणी सांगून आई तिला पुन्हा आपलसं करू पहाते. ट्रेसाचा निश्चय मात्र पक्का असतो. तिला वाटत असतं या दिशेने जीवन सोपं होईल.. आपल्याला ओळख मिळेल, पैसा तर भरभक्कम मिळेल नि नंतर आपण आपल्या बॉयफ्रेंडसोबत आरामात राहू शकतो.. आईच्या समजावण्याने ट्रेसाचा निश्चय ढळत नाही.

दरम्यान तिचा बॉयफ्रेंड तिला अधूनमधून भेटत रहातो.. एकदा तिला आपल्यासह एका नातेवाईकाच्या वाढदिवसाला नेतो. ट्रेसा तिथे पोचते तो साऱ्यांच्या तिच्याकडे पहायच्या नजरा एका क्षणात बदलतात आणि यावेळी तिला ते जाणवतं. ट्रेसाला काहीतरी वेगळं जाणवतं. परतताना तिच्या मनात योग्य अयोग्यचं द्वंद्व सुरू झालेलं असतं. मग एकदा तिचा बॉयफ्रेंड तिला नीट समजावतो, तो सांगतो .. की हे बघ तू जर हे काम करणार असशील तरीही माझं तुझ्यावरचं प्रेम अबाधीतच आहे आणि राहील .. पण मी मनापासून सांगतो, की या अशा निरर्थक आणि उथळ कामासाठी आपलं जीवन नाही.. आणि मग तो बरंच काही समजावतो. आता ट्रेसाला त्याच्या प्रेमाची मनोमनी खात्री पटते. तोवर पॉर्न व्हिडीओ मध्ये काम करताना तिच्या गाठीशी बरेच अनुभव जमा झालेले असतात. शारीरिक दुखापती तर होतातच पण त्याचबरोबर जगातल्या काही विकृत माणसांच्या विकृती शमवण्यासाठी आपला होणारा वापर म्हणजे नेमकं काय याची जाणीव तिला झालेली असते.

ट्रेसा पुन्हा एकदा सुट्टी घेते नि आपल्या घरी जाते. यावेळी ती आपल्या बॉयफ्रेंडला आपल्या आईबाबांना भेटवणार असते. वडीलांना तिने आजवर तिच्या कामाविषयी कळू दिलेलं नसतं, त्यांच्या पुढ्यात उभं राहून आपल्या चुकांची कबूली देणार असते.. ती घरी जाते आणि यावेळी हिंमत करून आपल्या वडीलांना आपल्या कामाविषयी सांगते.. ती सांगते तेव्हा तिचे वडील म्हणतात, मला अंदाज आला होता मुली तू हे काम करतेस पण मी वाट पहात होतो तुझ्या स्वतःहून माघारी फिरण्याची .. वडिलांच्या या उद्गारांनी ट्रेसाचं मन गलबलतं, तिला जाणवतं आपल्या वडीलांचं मोठेपण.. नि आपण किती उथळ वागत होतो आजवर .. तेही केवळ भौतिक सुखांसाठी .. आणि ट्रेसा बदलते.. तिचा बॉयफ्रेंड, तिची आई यांचे प्रयत्न यशस्वी होतात.. ट्रेसा कायमची माघारी परतते..

या फिल्ममध्ये ट्रेसाप्रमाणेच आणखी चार मुलींचीही अशीच खरीखुरी कथा आहे. त्यांपैकी काहींना बदलायची इच्छा आहे, तर काही स्वतःहूनच या मार्गाला आलेल्या आहेत.. काहीजणी इतक्या पुढे गेलेल्या आहेत की त्यांचे परतीचे मार्ग केव्हाच बंद झालेले आहेत.

ही फिल्म पहावीशी वाटली कारण इंटरनेटच्या युगात पॉर्न हा विषय आम्हा तरूण मुलामुलींना अजिबात वर्ज्य नाही ( मी विषय म्हटलंय, व्हिडीओ नाही.. पॉर्न व्हीडीओ पहाण्यावर कायदेशीर बंदी आहे ). इंटरनेटमुळे जग आमच्या मुठीत आलं तशी दूर देशातली माणसंही आमच्या अगदी जवळ येऊन ठेपली. एकवेळ आपल्या शेजारी कोण रहातं हे आम्हाला माहिती नसेल पण इंटरनेटवर निरनिराळ्या देशातले आमच्यासारखे तरूण मुलंमुली आमच्यापैकी अनेकांनी जोडले असतील. अशावेळी, अमेरिकेसारख्या देशात सुरू झालेल्या या पॉर्न इंडस्ट्रीबद्दल आणि तिथे मोठ्या स्वखुशीने काम करण्यास उत्सुक असलेल्या या ट्रेसासारख्या तरूणी आणि तरूणांबद्दल, त्यांच्या भावविश्वाबद्दल, त्यांच्या आयुष्याबद्दल, त्यांच्या विचारपद्धतीबद्दल आम्हाला उत्सुकता वाटणं स्वाभाविकच आहे.. म्हणूनच केवळ ही फिल्म पाहिली.. आणि अखेर हाताशी लागलं ते फार फार ह्रदयद्रावक होतं. बेगडी, प्लास्टीक दुनियेसाठी प्लास्टीकच्या बाहुल्या बनून माणसांना वागवणारी ही इंडस्ट्री .. यांना मानवी भावभावनांची खोली कशी कळणार .. ? यांना नीतीमत्ता कशी कळणार ..? जे विकलं जातं ते विकत सुटणारे हे लोक .. यांना केवळ भरपूर पैसा हवा नि भरपूर प्रसिद्धी हवी, पण ती कोणत्या टर्म्सवर आपण मिळवतोय याचं त्यांच्यालेखी काहीही महत्त्व नाही. विस्कटलेली आयुष्य नि चुरगळून गेलेली स्वप्न .. पण कदाचित त्याचंही त्यांच्यालेखी काही मोल नाही.. अशा इंडस्ट्रीत ट्रेसासारखी एखादीच कुणी सापडते .. तिच्यासाठी मन तुटतं .. इतकंच .. बाकी काही नाही ..!!

- मोहिनी घारपुरे - देशमुख